Kroniek der CVOHV
Tiedlien van CVOHV
We sjrieve 28 jannewari 2003, eine daag es alle angere.
Of toch neet…?
In aanloup nao de Vastelaovendj vatte Geert Janssen ’t idee op om det jaor es Prins Carnaval verkleijd te gaon. Al snel haaj der in Daniëlle Wolfhagen ein prinses gevonje. De rest van de vrunjegroep haaj der auch waal ore nao om un jaor es carnavalsvereniging der op oet te trèkke, want al snel booje unne hofnar, adjudanten en raod van ellef zich aan om ’t plaetje te complementeren. Mit vastelaovesgekke oet Brach en de Baek mos, gelet op de gezonje rivaliteit tusse dees kernen, ein neutraal grondjgebied gekaoze waere es thoesbasis. ’T Viaduct euver de Kruuswaeg, det beide kernen splitst, woor de logische keus.
Carnavalsvereniging
Onger ’t Viaduct woor gebaore!
Geert zoog ’t al gans veur zich, hae es Prins Carnaval. Zien mam waerde dan auch ingesjakeld om oet ein fluweel stofje mit tijgerprint ein cape te make. De steek waerde geleend van eine gooje vrundj, de vaere gebietst biej zien broor, de prinseplaat (die nog altied in gebroek is) waerde biej de paerdemaedjes oppe kop getikt, en veur €2,50 waerde biej de kringloupwinkel eine houte deigroller aangesjaft es scepter, sticker van ’t Viaduct en ein legopöpke derop en klaor woor de outfit van de Prins. Waal mos der nog get verzonne waere woaan de leeje van de raod te herkinne wore. Eine stapel Unox-mutse booj oetkomst, wobiej ’t Unox-logo vakkundig waerde aafgeplekt mit de rest van de zelf geprinte Viaduct-stickers.
Maar aangezeen dit hersenspinsel woor gegreujd toet ein ganse vereniging, mos der natuurlik auch ein receptie gehaoje waere. Mit leeje van twee kenj van de A2 kos de receptie maar op ein plaats gehaoje waere, onger ’t viaduct euver de Kruuswaeg, os eige stukske niemandsland tusse Brach en de Baek. Tiejes de receptie waerde zelfgemaakte medalies in de vorm van goud gespaote petrisjöälkes oetgereikt, en deende geplastificeerde kaertjes es hoesordes. Nao ’t offiesjeele gedeilte waerde ’t fieës nog toet in de late uurkes doorgezat in de foyer biej Geert inne Spil.
Mit de huifkèr van de Spil es praalwage waerde auch mitgedaon aan de optocht. Mit kilo’s spijkers en grieze verf die neet bepaald watervast woor (zo bleek bliej ’t opstelle veur de optocht toen ’t begos te raegene) waerde ein Viaduct gemaakt veur oppe wage. De verf woor echter neet ’t enige probleem. De Prinses ging mitte Vastelaovendj skieje! Ein paspop mit de jurk van de Prinses aan waerde es stand-in geregeld. Auch de spreuk waerde veur de gelegenheid aangepast van ‘Mit die van de slechter en dae van Janssen, wurdj het de hielle Vastelaovendj sjanssen!’ nao ‘Veur de Prins gein gevriej want de Prinses stuit oppe ski’.
De vrunjegroep haaj de Vastelaovendj van höär laeve. Versjillende activiteiten in Brach en de Baek waerde bezog, ze haaje un eige receptie, ze deeje mit aan de optocht, en mit Vastelaovendj ginge ze es carnavalsvereniging op sjtap biej de Stoba in Ech. Zo waerde vrundjsjap kammeraodsjap, de belaefde avonturen waerde blievende herinneringen en vrunj waerde Viaducters!
Nao ‘t ieërste impulsieve jaor waerde beslaote om door te gaon es carnavalsvereniging. Un drie koppig bestuur waerde aangesteld, en plannen veur un eige Prinsoetrooping in de Spil, dae toet tempel woor gebombardeerd, waerde gemaakt. De Unox-mutse waerde vervange door echte steken. De pries woor echter waal ein probleem veur de erme studenten. Dus toen ein studentencarnavalsvereniging oet Leiden hun steken en Prinsecape veur ein zacht priejse te koup zat op Marktplaats, waerde direct aafgereisd nao Leiden. Toet oppe daag vanvandaag gebroeke weer detzelfde ontwerp en kleurstelling veur os steken.
In de jaore die volgde waerde ’t Viaduct bietje biej bietje steeds professioneler. Versjillende commissies waerde in ’t laeve geroope en naeve ’t jaorlikse prinsoetroope en de receptie waerde ’t aope pop- en rockpodium Maasgouwmania (same mit ZH St. Lazerus), de halfvastenzitting Cique de Vastelaovendj (same mit de Hermenie), en veur de jeugd ’t BBBB oftewel ‘t Boetegeweune Brachter Binne Bal (same mit JCV de Pölle en ’t Jeugdwerk/KVW Maasbracht) georganiseerd.
In 2013 waerde ‘t 1×11 jaorig jubileum gevierd. Der waerde groeats oetgepakt mit de LVK Sing-A-Long. Tal van vaste waarden van de LVK finale trooje op veur ein bomvolle Spil, dae op det moment meer weg haaj van ein sauna. De songteksten waerde op ein sjerm geprojecteerd en koste dus door eederein mitgezonge waere. Tiedens ein druk bezochte jubileumreceptie waerde 7 jubilarissen, leeje van ’t eerste oer die nog altied lid wore, in ’t zunke gezat.
Om de Viaducter formule en ozze Limburgse Vastelaoves cultuur te behaoje veur de toekoms is verangering aaf en toe neudig. Nao ’t jubileum noom dan auch ein nuuje generatie Viaducters, aangevuld mit get ‘aoje rotte’ van ’t ieerste oer ’t stekske van ‘t bestuur euver. De prinsoetrooping transformeerde toet de ViVaS, mit ein vlotter, aantrekkelikker programma mit LIVE-meziek, verrassende elementen en veural minder zeiver. Oppe receptie höbbe weer de klok mit 11 minuut 11 aan spraektied gelanceerd. Ein van de vrouwelikke leeje is toegetraoje toet ’t bestuur en aan nuuje aanwas gein gebrek. Men kint immers neet altied blieve functionere mit de opvatting ‘we doon det zo want det höbbe we altied zo gedaon’. Doe höbs jeugd neudig mit eige, nuuje, frisse ideeje en opvattingen. Doe mos simpelweg mit de tied mitgaon. Want de Vastelaovendj verangert mit de waereld om os haen.
Det weer noe, al die jaore nao det hersenspinsel van Geert, nog altied bestaon, kumpt neet allein doordet weer os blieve vernuuje, maar waas os auch noeëts gelökt zonger os aojers, femilie, vrunj, kènnisse, fans en sponsoren die os altied gesteund höbbe. Dankziej hun höbbe weer os weite te transformeren toet ein volwaardige carnavalsvereniging mit bestaonsrecht binne oos gemeinsjap.
Kortom, waat ooit es grap is ontstange, haeft zich in de loup der jaore ontwikkeld toet ein serieuze vereniging. Hoewel, serieus… ’T Viaduct is eigenzinnig, soms ein tikkeltje eigewies, weer doon ‘t angers ès angers en angers ès angere, maar baovenal zeen weer eine vrunjegroep van Vastelaovesgekke die nieks leever doon dan same Vastelaovendj viere!
